Bera Berak derrigorrezko garaipen bat eskuratu du ohorezko mailan aritzen den 700. partidan, Esportiu Castelldefels 22-29 gaindituz Can Vinader kiroldegian buruturiko norgehiagokan.
Donostiarrek ez zioten lehenengo zatia aurkariari oparitu. 6-0 defentsan, Pinedo, Elorza, Núñez eta Ederra erdian, Reyes Carrerek Arizaga, Pinedo eta Elorza jarri zituen erasoan. Handik gutxira Dunayk andoaindarra ordezkatu zuen eta Alba Menéndezen lizarrakoa defentsan.
Bera Berak erasoa landu zuen. Pinedo, Ederra, Elorza eta Ziarsolok birritan - jokaldian eta kontraerasoan- asmatu zuten 2-5 aurrea hartuz 8. minutuan. Halere, Castelldefelsek berdintzea lortu zuen Gilen bi kontraerasoei esker.
Donostiarrek erasoa luzatu zuten eta defentsan arazoak zituzten Gómez pibote eusten. Golak eman dira ate batean zein bestean baina 6-0 defentsak etekinak eman dizkio Bera Berari. Castrok lapurturiko baloi batek Menéndezek aprobetxatu du kontraerasoan 9-10 jarriz (17. Min). Hortik aurrera Bera Bera ez du berdinketarik jasan Matxalen Ziarsolok penaltiz asmatu duelako. Halere, zutoinek aldea zabaltzea galerazi diete donostiarrei (11-14, atsedenaldian).
Bigarren zati hasiera erabakiorra izan da. Bi penaltiei esker Castelldefels gerturatu da 13-15 baina Pinedo, Ziarsolo, Elorza eta Dunay jokalariei esker, Bera Berak 0-4 partziala gauzatu du (13-19, 36. min). Bera Berak partida ondo kudeatu du tartea eta aurkariarekiko aldea handitu du Ziarsolok zazpi metroetan asmatzen jarraitu duelako, kontraerasoetan ere bai, eta Pinedo gehitu zaio (16-24, 48. min).
Azken minutuetan defentsak lasaitu egin dira eta golak trukatu dituzte batzuk eta besteek.
Valentzian jasotako porrota ostean, Bera Berak sendotasun itxura eman du Castelldefelsen. Elche Mustang eta Rocasak lortu dituzten garaipenek ez dute lasaitasunerako paradarik uzten baina taldeak helburuan sinisten du. Lau final gelditzen dira, hurrengoa larunbatean, apirilak 20, Bera Berak Bidebietan (19etan) Cleba Leon hartuko duelarik.
Fitxa: Castelldefels 22, Bera Bera 29
E. Castelldefels 22 (11+11): Lladro, Gil (5), Manaut (1), Pérez, Boada (3), Gómez (6, 5p) eta Moreno –titularra- Sans (2), Cadens, Alfaro (2), Noelia, Royo (1), Espinola (2) eta Bolstad (p.s.)
Bera Bera 29 (14+15): Zoqbi, Castro (1), Elorza (2), Núñez (2), Ederra (3), Pinedo (7) eta Ziarsolo (10, 4p) –titularra- Arizaga, Dunay (3), Menéndez (1) eta Altuna.
Epaileak: Agatha Gracia –katalana- eta Vanesa Pérez –galiziarra-
Kanporaketak: Sans Castelldefelsetik eta Pinedo (2), Elorza, Altuna eta Castro Bera Beratik
Partzialak: 2-2, 4-5, 8-8, 10-11, 10-13, 11-14 –atsedenaldia- 13-18, 14-20, 16-23, 16-24 eta 22-29.
Asteburu honetan Bera Berari lotuta dauden taldeak, plazara. Bihar Errenteriako udal kiroldegian Bera Bera Egia Infantil Bat taldea Ereintza Aguaplasten aurka arituko da 12,30etatik aurrera. Bestetik, Bera Bera Egia Infantil Bi taldeak Yoldi kiroldegian Aloña Mendi hartuko du igandean 12etan.
Foru Aldundia txapelketan, Bera Bera Egia kadete taldeak Bidebietan Urnieta Mecanizados Kamox taldearen aurka jokatuko du bihar 16etan
Eta Egia Bera Bera senior taldea, Gasteizen arituko da igandean, Lakua kiroldegian 12,30etan, Ies Construcción taldearen aurka.
1990. urtean ohorezko mailan debuta egin zuenetik, talde donostiarrak maila honetan 23 denboraldi jarraian egin ditu, edo gauza bera, Garako kazetari Juan Carlos Elorzak bildutako datuen arabera 700. partidari ekingo dio bihar Castelldefelsen (19,30etan, Agatha Gracia –kataluniarra- eta Vanesa Pérez –galizarra-).
Aurreneko denboraldian ez bezala data testuinguru ezberdin batean iritsi da, izan ere, Bera Berak gutxitan izan du liga jokoan eta garai hauetan líder, inoiz ez. Horregatik biharko norgehiagokan Bera Berak bi puntuak behar ditu lidergoari eusteko beste jardunaldi batez, urtarrilaren 12an Rocasari irabazi eta Alcobendasen Elcheren porrota lagun lortu zuena.
Izan ere, elxetarrak eta kanariarrak dira aurkari zuzenak oraindik ere. Lehengo astean Helvetia Alcobendas eta Mecalia Guardés taldeek agur esan zioten ligari, azkeneko bost jardunaldietan erabakiko dena. Rocasak Itxako hartuko du, Elchek Mar Alicante, hau da, sailkapeneko gorenekoak puntu premia dituzten taldeen aurka lehiatuko dira gelditzen den jaisteko postu bakarra saihesteko -Castro Urdialesek matematikoki maila galdu du dagoeneko-.
Lehengo larunbatean bezala Eider Rubio baja izango da sorbaldan, arazo horiek ezin gaindituz dabil donostiarra. Aurrean, Esportiu Castelldefels. Reyes Carrerek lehengon esan zuen “ez zuela merezi mailari eusteko borrokan egotea”. Bidebietan bere jokalari gazteak joku alaia egin zuten, puntuak behar dituzte, Bera Beraz gain Guardes eta Elche hartuko dituzte Can Vinader kiroldegian eta datorren larunbatean partida erabakiorra dute Etxebarrin Kukullagaren aurka.
Bera Bera Eskubaloia ezaguna da intentsitate handiko partidak gustoko dituelako eta, ondorioz, minutuak pasatu ahala aurkaria atzean uzten du normalean. Otsailetik hona Ligan eta Kopan jokaturiko azkeneko hamar partidetan gehienetan gertatu dena.
Denboraldiko unerik garrantzitsuenetan, baliabide horiei esker Vistal Laczpol Gdyniaren aurkako kanporaketa irauli egin zuen Bera Berak eta, era berean, aurkariari lehenengo zatian utzitako abantaila donostiarrek gehienetan egoerari buelta emateko aukera izan dute. Bigarren zatietan bi taldek baino ez dute hamaika gol sartu azkeneko hamar partidatan.
Ibilbidea marrazten otsailaren 10ean hasi zen Bera Bera. Poloniako txapeldunen aurkako kanporaketa irauli egin zuen egunean. Bera Berak hamar gol jaso zituen bigarren zatian, kanporaketari bere alde jarri zuenean eta Vistal Laczpol taldearen erreazkioa ekidin zuen.
Partida horren ostean, donostiarrek asteazkenean Lizarrerian jokatu zuten. Itxakok zortzi gol sartu zituen azkeneko 30 minutuetan (17-32, amaieran). Handik hiru egunetara Etxebarrin, Kukullagak 11 gol egin zizkion Bera Berari. Donostiarrak lehenengo zati amaieran aurretik jarri ziren eta bigarren zatian 17 gol sartu zituzten (21-29 amaieran).
Kopan, iraulketak
Kopa iritsi zen otsailearen 21ean. Ostegun horretan Zuazo Barakaldo atsedenaldira 11-13 aurretik iritsi zen. Bigarren zatian bizkaitarrek zazpi gol baino ez zituen egin –azkeneko hamar minutuetan, bi- eta Bera Berak luzapenean gainditu zuen Zuazo, penaltiz gol bakarra egin zuena.
Final-erdietan, hurrengo iraulketa. Atsedenaldian Elche 8-12 nagusi. Bera Berak defentsan partziala itzuli zuen, hau da, elxetarrek zortzi gol sartu zituzten eta donostiarren 15 golei esker, partida irabazi (23-20) eta finalerako txartela lortu zuten. Eta asteko hirugarren norgehiagokan, Bera Berak 2-5 hasierako partziala gainditu zuen, 14-10 iritsi zen atsedenaldira baina bigarren zatian sufritzen jakin izan zuen (25-24) Kopa eskuratzeko (kanariarrek 11 gol sartu zituzten).
Martxoan, Ligara itzulita, Mecalia Atlético Guardés taldeak ez zuen Bera Bera estutu Bidebietan. Galizarrek zortzi gol sartu zituzten bigarren zatian (27-17 amaieran). Handik lau egunetara, Alacanten Mar Alicante 15-13 heldu zen aurretik atsedenaldira baina ez zen hamar goletara iritsi ondoren (24-28 amaieran).
Eta Elche Mustang taldearen aurkako partida erabakiorra iritsi zen. Bidebieta gainezka, partidaren jabe lehenengo zatiaren erdialdean egin zen Bera Bera (13-10 atsedenaldian). Kopan bezala, elxetarrek zortzi aldiz zulatu zuten donostiarren sarea (24-18 amaieran). Valentzian, nahiz eta bigarren zati bikaina egin, zortzi gol egin jasoz, Bera Berak hamar baino ez zuen egin eta punturik gabe itzuli zen. Azken norgehiagokan, Helvetia Alcobendas 11-13 aurretik iritsi zen atsedenaldira eta donostiarrek bigarren zatiaren hasieran irauli zuten partida, madrildarrak bederatzi golekin utziz (26-22 amaieran).
Bera Bera bigarren zatietan sendo sentitu arren Liga amaitzeko gelditzen diren bost partidatan datu hauei gehiegi ez erreparatzea espero dugu.
Juan Antonio Garaikoetxearen argazkia.
Bera Bera Eskubaloiko entrenatzaile Reyes Carrerek gaur publikoki ezagutzera eman du “nik bakarrik hartutako erabaki baten arabera datorren urtean ez dut taldea zuzenduko”.
Bera Bera Eskubaloiko arduradun Tati Garmendiarekin batera emandako prentsaurrekoan, Reyes Carrerek onartu du “duela hilabete batzu hartutako erabakia da”. “Nire ustez Bera Beran entranatzaile gisa eman dudan aroa amaierara iritsi da” azaldu du “niretzako onena delako eta hala bada taldearentzat ere bai” gehitu du.
Reyes seigarren denboraldia betetzen ari da entrenatzaile moduan hirugarren etapa honetan. 1999an, denboraldi amaieran, jokalari zela taldearen ardura hartu zuen 2001-02 denboraldira arte. Berriro Bidebietako eserlekura itzuli zen 2004-05 eta 05-06 urteak zuzentzeko eta azken fase hau 2007-08 denboraldian hasi zuen. Palmaresari begiratuz gero azpimarragarriak dira 2008 eta 2012 urteetako Superkopak, 2009 eta 2013 urteetako Kopak eta Europako ibilbideaz 2008ko Errekopako finalerdiak.
Horrez gain, “etorkizuna lilugarria da, oraina baino hobea, ez dut proiekturik buruan, liga amaitu nahi dute eta atsedena hartu” adierazi du, nahiz eta onartu duen “eskubaloia nire lana da, nire lanbidea, nire bizitza eta nire zaletasuna”.
Liga eskuratzeko aukeraz galdeturik,Reyesek onartu du “pozgarria izango litzateke liga irabaztea, amaiera bikaina jarri eta jokalarientzako ere urrats handia halere, nire lanarekin gustora nago eta kontzientzia garbia dut”. Zentzu honetan, “Bera Berari lotuta dauden baloreak” aipatu ditu ligako azken bost partidei heltzeko “esfortzua, mentalitatea, kemena, elkartasuna, anbizioa, sufritzeko gaitasuna, horiek guztiak, minutu bakoitzean egon behar dira”.
Bestetik, Tati Garmendiak Reyesen lana goraipatu du. “Palmaresaz gain, Reyes aipatzen dugunean konpromisoaz mintzatzen gara, lanaz, seriotasunaz, inplikazioaz, balore hauekin gelditzen gara eta horregatik beti Bera Bera Eskubaloiak Reyesen lana eskertuko du”.
Horrela, aro berri baten aurrean dago Bera Bera, nahiz eta denboraldia “bost finalak irabazten” amaitu nahi duen.
