13 Abuztua 2013

Arratsaldeko lehen orduan Espainiako Federazioak web orrian konfirmatu duen bezala, Bera Berak eta Kopako azpitxapeldun BM Ro’Casa taldeek jokatu behar duten Superkopako finala Donostian ospatuko da, irailaren 4ean asteazkena 20etan, eta Teledeportek eskainiko du zuzenean.
Telebistak zuzenean emango duenez, partida irailaren 4ra aurreratu da eta Josean Gasca kiroldegian ospatuko da. Bi taldeak, Bera Bera nahiz BM Ro’Casa, adostasun batera iritsi dira gastuak partekatzeko.
Lehengo astera arte Bera Berak ez zuen Superkopa antolatzeko asmorik agertu. Halere, Federazioak finala azaroaren bukaerara edo 2014ko urtarrilera atzeratzeko iradokizuna egin zuen. Aipaturiko aukera ez zen taldeen gustoko izan eta hiru eragileen artean elkarrizketak areagotu dira azken egunetan data ezartze aldera.
Gainera, partida erakargarria da, izan ere, Bera Bera eta BM Ro’Casa taldeak, Silvia Navarro atezain internazionala fitxatu duenez, 2013-14 denboraldirako Estatuan jokatuko diren lehiaketak irabazteko faborito nagusien artean izango dira.

10 Abuztua 2013

Bera Bera Eskubaloia prestaketa lantzeko partida saioarekin hasi da gaur Cleba León gainditzen (25-15, 12-9 atsedenaldian) Zumaiako Lubaki Kiroldegian gaur arratsaldean ospatu den norgehiagkoan, bi taldeentzako aurredenboraldiko lehenengoa hain zuzen. Bost eguneko entrenaldi saioak burutu ostean, Imanol Álvarez entrenatzaileak jokalari guztien artean minutuak banatu ditu. Vero Cuña zentrala, min hartuta, baja izan da eta, ondorioz, Nagore Arizaga hartu du ardura, lau golekin oso partida amaiera ona eginez. Partida hasieran, Bera Berak Castro, Pinedo eta Núñezen golei esker tartea zabaldu du (20. min, 9-5). Halere, Cleba Leonek eutsi dio Bera Berari 45 minutura arte (15-13). Hortik aurrera kontraerasoak izan dira hizpide. Bera Bera 5-1 defentsarekin aritu da eta atepean, Yamiley Rodríguez lehenengo zatian eta Ana Temprano bigarrenean. Horrez gain, Uxue Ezkurdia, Esther Arrojeria, Olatz Ramón eta Eider Lizarbe jokalari gazteak minutu batzu izan dituzte. Bera Bera 25 – Cleba León 15 Bera Bera 25 (12+13): Yamiley, Castro (4), Elorza, Arizaga (4), Menéndez, Núñez (4), Pinedo (5), Ziarsolo (2, 1p), Ana Martínez (1), Dunay, Ederra (1), Ezkurdia (2), Arrojeria, Olatz Ramón (1), Eider Lizarbe (1p) eta Ana Temprano (o.a.). Cleba León 15 (9+6): Cristina González, Caño (6), Marina González (1), Méndez, Ubillos, Ilina (5), Pérez, Lozano (1), Cristina Álvarez, Gutiérrez, Andrea Álvarez, Rodriguez (2) eta García. Partzialak: 2-1, 6-2, 8-2, 9-5, 11-7, 12-9 – atsedenaldian- 14-10, 15-10, 15-13, 18-14, 22-15 eta 25-15.

08 Abuztua 2013

Aste osoan zehar, entrenaldi gogorrak burutu ostean, aurtengo Bera Bera Eskubaloiari estrenatzeko ordua iritsi zaio lagunartekoetan. Larunbatean izango da, Zumaiako Lubaki kiroldegian Cleba Leonen aurka.
Imanol Álvarez entrenatzailearen jokalariek pistan ezezik prestaketa fisikoa lantze aldera ere orduak eman dituzte eta abuztuaren 10ean hasiko dira astero bi norgehiagokei heltzen, urritik aurrera biziko dutena, hain zuzen.
Iaz bezala, Zumaian neurtuko da Bera Bera ligako taldeekin. María Núñez, Silvia Ederra, Adriana Castro eta Nitsan Dunay jokalariek debuta egin zuten orduan; aurten, berriz, Ana Temprano eta Ana Martínezen txanda izango da. Cleba Leonek ere entrenatzailea aldatu du Javier Callejo gaztearekin apostua eginez eta iazko jokalari multzo gehiena mantendu du. Beraientzako ere lehenengo partida izango da.
Hurrengo lagunartekoa Frantzian izango du Bera Berak, abuztuak 14 asteazkena, 18etan Mios Biganos talde indartsuaren aurrean eta abuztuaren 17an Nafarroako Mendavian Zuazo Barakaldoren aurka.

05 Abuztua 2013

Lehenengo aldiz Liga eskuratu zuenetik hiru hilabete baino gutxiago igaro denean, Bera Bera Eskubaloiak gaur hasiera eman dio denboraldi berri bati Josean Gasca kiroldegian buruturiko entrenaldiarekin. Imanol Álvarez entrenatzailea, Ana Temprano atezaina eta Ana Martínez internazionala dira aurtengo nobedade nagusienak, Champions League hizpide izango den urtean, hain zuzen. Europako kluben arteko lehiaketa nagusiko multzoen fasean debuta egingo du Bera Berak urriaren 6an Gascan prebiatik iritsiko den aurkari batean aurrean. Zoqbi, Rubio eta Altuna jokalarien bajak izanda, iazko taldetik hamaika jokalari daude. Horrez gain, ohorezko mailako urratsak betetze aldera, aurredenboraldia burutuko dute Uxue Ezkurdia eta Esther Arrojeria –iaz minutuak izan zituzten-; Olatz Ramón, Eider Lizarbe, Maitane Etxeberria –Poloniako 17 urte azpiko Eurokopa jokatuko du abuztuaren 15etik 24ra bitartean- eta Usurbil K.E. taldeko Lur Errekondo. Horrez gain, iraila estu bati aurre egin beharko diote donostiarrek. Izan ere, Bera Berak eta iazko Kopako finalista, Rocasak Superkopa izango dute jokoan irailaren 7an eta astebete beranduago helburu nagusi den ligari hasiera emango dio A Guardan. Irailaren 14an Mecalia Atlético Guardes, indartu den taldearekin aurka egingo du debuta eta irailaren 21ean Rocasa hartuko du Bidebietan, ligaren ibilbiderako partida garrantzitsua izango delarik. Imanol Álvarez entrenatzaileak baloiari garrantzi handia eman nahi dio aurredenboraldian, ondorioz, pistan egingo duten lana handia izango da. Eta prestakuntza fisiko ere bai. Gaur bezala, bihar asteartea, ostegunean eta ostiralean, goizeko 10,30etatik aurrera, taldea Gascan entrenatuko da eta arratsaldean Anoetako miniestadioan Iker Fernández prestatzaile fisikoaren gidaritzapean. Asteazken goizean, fisikoa miniestadioan bakarrik. Bera Berak zazpi lagunarteko jokatuko ditu, aurrena Zumaia larunbatean, hilak 10, 17,30etan Cleba Leon taldearen aurka.