17 Iraila 2013

Lehengo larunbatean A Guardakoa, Porriño- Canyamelar Valencia (18-21) norgehiagokarekin batera, jardunaldiko gol gutxien eman zuen partida izan zen. Eta Mecalia Atlético Guardésen zenbakiek oso ondo adierazten dute gipuzkoarren defentsa eta atezainen lana (16-23). Atsedenaldian sei gol eta amaieran hamasei. Zenbaki hauek gutxitan ematen dira. Izan ere, iazko denboraldian Mecaliak bataz beste 26,6 gol sartu zituen A Sangriña kiroldegian. Azkeneko hamarkadako emaitzei erreperatuz gero, Bera Berak beste zazpi alditan jaso ditu 16 gol edo gutxiago epe horretan, hiru aldiz 2003-04 denboraldian eta beste hiru, 11-12an. Azpitxapeldun gelditu zen denboraldian, hirugarren jardunaldian Gijonen, Bera Berak 15-34 irabazi zuen, 2012ko urtarrilean (13. Jardunaldian) Ucam Murtziak 13 egin zizkion eta hurrengo asteburuan Etxebarrin Kukullagak, 16. Denboraldi horretan BM Porriñok 11 gol sartu zituen Bidebietan, 2011ko urrian. Duela hamar urte, 2003-04 denboraldiak ia aurtengo hasiera izan zuen (15-23), orduan, Madrilgo Juventud Leganésen aurka irailaren 13an. Handik bi astera Rocasa 15 goletan utzi zuten donostiarrek (29) eta 12 goletan Granadako Transarnilla Iznalloz taldea 2004ko urtarrilean. Eta azken hamarkadan Bera Berak bere atea 16 goletan edo gutxiago utzi zuen falta den partida Ribarrojan izan zen, 2010eko apirilean (16-37). Iaz, Ligako txapelketa eskuratu zuen denboraldian, 17 goletan utzi zuen Itxako Lizarrerian (17-32) Poloniako taldearen aurrean Cup Winners Cupeko iraulketa ostean eta Zuazo Barakaldo, 18 goletan apirilaren amaieran. Estadistikak Lehengo larunbatean, Mecaliak 39 alditan jaurti zuen Ana Tempranoren ateruntz (Yamiley penalti batera atera zen) 16 gol sartzeko. Horietatik, penaltiz sei gol lortu zituzten (bederatzi jaurtiz), bi kontraerasoz, lau barneraketaz, kanpoko jaurtiketaz hiru eta alboetatik bakarra, Ana Tempranok %46,4a lortuz. Bestalde, Bera Berak 37 jaurtiketa egin zituen 23 gol lortzeko. Eli Pinedok guztiak sartu zituen -bederatzi gol, lau penaltiz; Ana Isabel Martínezek bederatzi jaurtiketatik sei sartu zituen, Elorzak 8/4, Castrok 4/2 Dunayk 2/1 eta María Núñezek 1/1. Zazpi metroetatik iritsi ziren lau golez aparte, kanpotik hamar, hiru barneraketa, eta kontraeraso, pibote posizioetatik eta albotik bina gol. Aipatzekoa da Matxalen Ziarsolok gola sartu ez izana, izan ere, iaz partida guztietan –Superkopa, Liga, Europa eta Kopa- sartu zuen gutxienez bat, A Sangriñan izan ezik, hasi eta berehala izandako lesio bat medio.

16 Iraila 2013

Europako selekzio moduko bat. Champions Leagueko D multzoa Mazedoniako txapeldun WHC Vardarekin osatuko da eta, ondorioz, talde honen aurka egingo du debuta Bera Berak multzoen fasean Josean Gasca kiroldegian urriaren 6an.
Italiako Eboli hirian asteburu honetan burutu den Qualification 2 delakoan, Vardar aise nagusitu zen larunbatean bertako Jomi Salernoren aurrean (35-16) eta atzo finalean bezperan Rostov gainditu (21-26) zuen Frantziako Fleury mendean hartu zuen.
Nely Carla, Darly Zoqbi eta Bea Fernández Bera Berako jokalari ohian diren Orleanseko taldeak ezer gutxi egin zuen Mazedoniako txapeldun indartsuenen aurrean (25-33, atsedenaldian 11-18) eta, ondorioz, Cup Winners Cup delakoan arituko da.
Izan ere, Mazedoniako lau jokalari, hiru frantsiar, lau errusiar, Montenegroko hiru, Serbiako hiru, Zebic kroaziarra, Itxakon egon zena, -golegile nagusiena atzo- eta espainiar pibote internazionala Begoña Fernández agertzen dira Vardarren plantillan.
Bertako jokalarien artean Nikolic zentrala da azpimarragarriena, Errusiako Zvezda taldetik etorrita iazko Championsean 15 golegile nagusien artean izan zena. Danimarkako Randers taldetik Dembele frantziarra iritsi da eta Oltchimetik, Pineau eta Leynaud atezaina.
Suslina atezain, Saidova eta Ekaterina Kostyukova errusiarrei Dinamo Volgogradotik etorritako Tatiana Khmyrova gehitu zaie. Montenegroko jokalarien artean Klikovac mantendu da taldean, Djokic beterana Rostov taldetik agertu da eta Györietik, Radicevic –atzo, zortzi gol-. eta Serbiarren artean,
Dmitrovic eta Lojpur jarraitzen dute eta Europako txapeldunetik Andrea Lekic fitxatu dute. Ez da gutxi!

Ligako 13 txapeldun
Asteburu honetan Championseko lau multzoak osatu dira, hau da, urriaren 5etik azaroaren 17ra bitartean lehian burubelarri arituko diren 16 taldeak. Hauen artean dira Ligako hamairu txapeldun eta Vardar taldeaz gain, Alemaniako Leipzig, Hungariako FTC eta Errumaniako Baia Marek lortu dituzte multzoen fasea jokatzeko txartela. Errumaniako taldeak Danimarkako bi talde gainditu zituen, larunbatean Viborg (26-25) eta finalean Team Tvis Holstebro (36-23). Argazkian, Montenegroko Radicevic (www.eurohandball.com).

14 Iraila 2013

Bera Berak ez du zalantzetarako betarik utzi A Guardan eta egungo txapelduna dela frogatzeko asmoarekin atera da. Izan ere, defentsak galizarren lehenengo lerroko jaurtiketak galerazi dituzte, non Porriñoko jokalari ohia Estela Doirok egin duen debuta. Donostiarrek erasoan kontraerasoetan eta posizionalean asmatu dute gaur, lehenengo zatian batez ere.
Bera Berak errespetua zor zion A Sangriña kiroldegia iaz puntu bat galdu zuelako eta Mecalia aipaturiko Dorio jokalariaz gain asko indartu delako, Manu Etayo entrenatzailea, barne.
Pinedok (2), Ana Martínez eta Patri Elorzaren golei esker, Bera Bera 0-4 aurreratu da hamar minutuen atarian. Mecaliak ezin zuen Núñez, Elorza, Menéndez eta Pinedok osaturiko orma gainditu.
Bera Berak erritmoari eutsi dio eta oraingo honetan Adriana Castrok eta Nitsan Dunayk zulatu dute Cristina Maestroren atea. Galiziarrak, bestetik, Estela Doiro eta Alesia Kurchankovaren esanetara ziren eta donostiarrek izandako hiru kanporaketak ez zituen Bera Berak larritu.
Atsedenaldian, donostiarren abantaila azpimarragarria zen (6-13) batez ere Mecaliak gola egiteko zailtasunak nabaria zelako. Bera Beran golegile nagusienak, Eli Pinedo (5) eta Ana Martínez (3).
Elxetarrak inauguratu du bigarren zatian markagailua baina Alesia Kurchankova izan da erantzukizuna bereganatu duena. 3-0 eko partzialarekin (41. min, 11-15) arduratu da Bera Bera baina Eli Pinedok moztu du galizarren bolada. Halere, bielorrusiarra saiatu da zazpi minutu falta zirela (15-19).
Baina epaileek adierazitako bederatzi penalti ez dira nahikoak izan eraso posizionalean Mecaliak asmatzen ez zuelako. Ana Martínezen gol batek –sei bere debutean- partida erabakita utzi du sei minutu falta zirela eta, ondorioz, Bera Berarentzako oso garaipen baliagarria.

Fitxa: Mecalia 16 – Bera Bera 23

Mecalia Atlético Guardés 16 (6+10): Maestro, Abad, Kurchankova (9), Doiro (4), Andrea Dapena (1), Alba Dapena, Amorós, Barrios, Raquel Côrte (2), Cerqueira, Laura Morais, Lucía Rodríguez (o.a.).

Bera Bera 23 (13+10): Temprano, Castro (2), Elorza (4), Martínez (6), Menéndez, Núñez (1) y Pinedo (9, 4p) –titular- Ziarsolo, Ederra, Dunay (1), Arizaga y Yamiley (p.s). Deialdian sartu ziren Arrojeria eta Maitane Etxeberria.

Epaileak: Gonzalo Miranda eta Fernando San Pedro (Madrid).
Kanporatuak: Raquel Côrte (2) Mecaliatik eta Castro, Pinedo, Menéndez (2), Elorza eta Dunay Bera Beratik.

Partzialak: 0-2, 1-4, 2-7, 3-10, 4-11, 6-13 –atsedenaldia- 7-14, 9-15, 11-17, 13-19, 15-20 eta 16-23.

13 Iraila 2013

Imanol Reformas, S.L. enpresaren babesarekin, Bera Bera Eskubaloiak datorren urriaren 7an kirolaren hastapeneko eskola martxan jarriko du, 2002 eta 2005 urte bitarteko neska zein mutilei zuzenduta dagoena.
Gazteek eta gurasoek ikasturtean zehar aurkituko dutena ikus dezaten, iraileko astelehenetan, hau da, 16, 23 eta 30ean, harrobiko koordinatzaile Verónica Valverderen eskutik, ate irekiak antolatu dira Bidebieta kiroldegian. Horrela, 18,30etatik 19,30etara, 8 eta 11 urte bitarteko gazteek eskubaloiaz gozatzeko aukera izango dute eta nahi dutenek ikasturteari begira izena eman.